عن محاربات سرطان الثدي.. ” بطلة حكايتك” مشروع تخرج في إعلام مصر الدولية

 

تحت عنوان “بطلة حكايتك” قرر طلاب جامعة مصر الدولية كلية الإعلام الإعلام اختيار مشروع تخرجهم للدعم النفسي لمحاربات سرطان الثدي، ركزوا في مشروعهم وحلمتهم على الصحة النفسية للمريضات لدعمهن في مواجهة المرض الخبيث القاتل

بدأ طلاب وطالبات كلية الإعلام مشوعهم بتلك الكلمات المعبرة عن نبل أهدافهم

احنا طلاب من كليه إعلام بجامعه مصر الدوليه.

بنعمل لمشروع تخرجنا حملة توعية ونأمل ان في يوم تتطبق في مصر بدعمكم لينا حملتنا بتركز علي اهميه الدعم النفسي لمحاربات سرطان الثدي في رحلتهم مع المرض في مصر عشان نبدأ نركز مع صحتهم النفسية خلال رحلة علاجهم مش بس الصحة الجسدية اللي واخدة دايماً اكبر قدر من الاهتمام علي حساب الصحة النفسية!

من خلال حملتنا و صفحة @batalethekaytekهنساعد وهنرشد أبطالنا وعائلتهم انهم يقدروا يتعاملوا مع

المرض من الناحية النفسية لإن ده أهم جزء في رحلة علاجهم مش بس عشان يتعالجوا من المرض لكن عشان يهزموا المرض!

فكرة حملتنا إن الحياة رحلة كلها اختيارات بايدينا نختار نعيشها أقوياء، أو ضعفاء مهزومين، ولا منتصرينحتى في مرضنا والاختبارات الي ربنا بيحطنا فيها بيدي لنا طريقين نختار بينهم يا إما طريق اليأس والضعف او طريق العزيمة والارادة والقوة للتغلب على المرض

انتي الي بايدك تختاري

رحلتك مع السرطان قسمناها ل٧ مراحل، ممكن تمري بيهم كلهم و ممكن تمري بجزء منهم ، كله علي حسب شخصيتك ممكن تتصدمي و تنكري و تخافي، حد تاني ممكن يتصدم و يخاف لكن يكون واقعي و مينكرش ، حد تالت ممكن يدخل في اكتئاب و حد تاني ممكن يبقي اقوي و ميدخلش في اكتئاب و احنا دورنا اننا نساعدك تعملي ايه في اي مرحلة من المراحل الي هتمري بيهم بطرق سهلة و بسيطة تقدري تعمليها لوحدك وافتكري دايماً انك لازم تبقي ايجابية، عشان نفسيتك هي مفتاح علاجك و عشان زي ما بندي اهتمام كبير لصحتنا الجسدية و علاجها لازم كمان ندي صحتنا النفسية حقها لان الاتنين بيكملوا بعض

و عشان كدة اختارنا رقم ٧ الي بيدل علي الايجابية عشان نشجع محاربتنا انهم يكملوا رحلة علاجهم بطريقة ايجابية و يتحولوا من محاربات لابطال مش بس اتعالجوا من المرض لكن كمان هزموه!

حكايتك في 7 مراحل

الصدمة:

طول ما احنا عايشين في الحياة بنتعرض للصدمات النفسية أو الجسدية من حقك تتصدمي و من حقك تخدي وقتك في الصدمة خدي الوقت المناسب للتأقلم مع الأزمة انتي محتاجة تاخدي وقتك علشان تتخلصي من المشاعر السلبية اللي جواكي لازم تعرفي انك مش هتقدري تفهمي و تستوعبي كل المعلومات اللي هتسمعيها مرة واحدة فا حاولي ما تسبقيش الاحداث لو حسيتي انك مش هتعرفي تعدي الصدمة لوحدك اطلبي مساعدة شخص قريب منك يكون معاكي

في الاخر لازم تعرفي ان بعد الصدمات النفسية الإنسان بيحتاج الوقت لاستعادة هدوؤه النفسى، وإعادة ترتيب أولوياته.

والاهم إنك تبقي واثقة وعندك يقين إنك هتعدي من اي أزمة

الإنكار:

أي صدمة بييجي بعدها إنكار للواقع تقبلك للموقف واستيعابه هو أول خطوة لنجاح رحلة علاجك ركزي على علاجك مش على المرض حللي اللي انتي بتخافي منه بصراحة اسمحي لنفسك بالتعبيرعن مخاوفك وعواطفك اتكلمي مع صديق مقرب أو شخص بتحبيه وفضفضي انضمي لإحدى مجموعات الدعم *أكيد بعد ما استوعبتي خوفتي.. خوفتي على نفسك وعلي اللي حواليكي

الخوف:

فكره المرض مُخيفة بس هي فكرة اتغلبي عليها اعرفي أكثر عن مرضك، اعرفيه كويس و كوني انتي المتحكمة في حياتك مش المرض اعرفي أكثر ازاي تتغلبي عليه.

اعرفي ان خوفك حاجه جواكي، دوري على أمل.. أمل في الحياة أمل فيكي يخليكي قادره إنك تكسري مخاوفك عشان في أمل.

اتكلمي، عبري عن كل المخاوف الي جواكي دائما افتكري ان السرطان مرض مش نهاية حياة.

الالم:

العلاج والتغير في حياتك اكيد سببلك وجع.. وجع جسدي ونفسي وجعك لازم تواجهيه حاولي تشغلي نفسك عن الوجع اعملي حاجه بتحبيها زي قراءه كتاب، أشغال يدوية، اسمعي أغاني أي حاجه تبعدك عن التفكير في وجعك.. اقضي وقت مع ناس بتحبيها. حاولى تعبري عن وجعك حاولى تحطى لوجعك مقياس وده عشان تقوليه للدكتور قد ايه حاسه بالوجع من ١ ل ١٠ عشان يقدر يديكي العلاج المناسب اللحظة الي ابتديتي تفقدي الامل فيها

اوعي تكتأبي

‎الاكتئاب:

خليكي عارفة إنك سند نفسك و متحاوليش تستلمي لليأس و السلبيات الي ممكن تسيطر عليكي في المرحلة دي، إنتي قوية ، عديتي بكتير و مفاضلش حاجة خلاص

انتي أقوى دلوقتي من أي مرحلة فاتت انتي عرفتي خلاص القوة الي جواكي الي بيها تتحملي اي حاجة مهما كانت صعبة

الاكتئاب ازاي تواجهي الاكتئاب ممكن تعملي حاجات بسيطة زي مثلاً لم تحسي إنك مكتئبة انزلي اتمشي حوالين البيت أو في مكان في مناظر طبيعية, المهم تكسري حالة الإكتئاب إلي انتي فيها أو ممكن تعمل حاجة بتحبي تعمليها في يومك العادي زي مثلاً تطبخي حاجة جديدة او ترسمي أو تسمعي أغاني، اكتبي في ورقة أسباب الإكتئاب وحولي تلاقيلها حلول. ممكن تاكلي أكل غني بفيتامين ب وده حيساعد على تقليل الشعور بالإكتئاب. ‎حولي متعزليش نفسك عن الناس عشان ممكن تلاقي قوتك في الناس الواقفة جمبك بس كوني انتي مصدر قوتك الاساسي

‎العلاج من المرض:

“علشان قررتي تكملي مشوارك و تحاربي المرض لحد الآخر” لو صدقتي ان العلاج بيخليكي احسن فعلا هيخليكي احسن

خدي وقتك في العلاج

اعرفي ان رحلة علاجك بتاخد وقت اسألي عن الأعراض الجانبية اللي ممكن تتعرضي لها علشان تعرفي تتعاملي معاها شعرك ابتدى يقع و حاسة بحروق في جسمك ده طبيعي في المرحلة دي لازم تتوقعي ان مع بداية العلاج الكيمائي وارد ان شعرك يبتدي يقع علشان كده ضروري تقصي شعرك قصة حلوة قصيرة حتي لو مغطياه و خليكي عارفة من جواكي انها مسألة وقت و هيطلع تاني احلي واقويوكوني واثقة انك جميلة في كل احوالك و لما تيجي تغسلي شعرك اتجنبي المية السخنة وخليها دايما فاترة و الشامبو يكون من الطبيعة خالي من الكيماويات زي شامبو الاطفال كده و برضه اسألي علي طاقية التلج وقت الجلسات لانها بتأخر سقوط الشعر في مرحلة حروق الاشعاع لو جالك لازم تتعاملي مع بشرتك بلطف زي انك ترطبي جسمك طول الوقت استخدمي المياه الساقعة عشان تخففي ألم الحروق غطي المكان الي فيه حروق بالضغط عليه بحاجة ساقعة بس لو حسيتي إن ابتدى أي تغير في اللون أو اي افرازات لازم تسألي الدكتور المعالج ابعدي عن اي لبس ضيق و متسخدميش اي كريمات بدون استشارة الدكتور استخدمي ملابس تحميكي من اشعة الشمس طول فترة العلاج

هزيمة المرض:

انتي فاكرة ان الكيماوي و الاشعاع و الأدوية بس هما علاجك؟ يبقي لسة فاضلك تكة!

احنا مش عايزينك بس تخفي وتقضي على السرطان احنا عايزينك كمان تقضي على كل تأثيره على حياتك ونفسيتك عشان تخرجي من المعركة دي منتصرة ١٠٠٪ دايماً حاوطي نفسك بناس مروا بنفس تجربتك

اشتركي في مجموعات الدعم النفسي ساعدي انتي كمان غيرك من المحاربات عبري عن كل مشاعرك سواء بالفضفضة مع حد بترتاحي له او علي ورق مارسي حياتك بشكل طبيعي سواء في بيتك شغلك مع عيلتك او صحابك متخليش المرض يقيدك خليكي انتي دايماً أقوى منه وخليكي إنتي المسيطرة عليه مش هو الي يسيطر عليكي

متتكسفيش تطلبي مساعدة من حد متخصص في الدعم النفسي وقت الاحتياج متفضليش دايماً في البيت، طول مانتي قادرة وعندك فرصة إنك تخرجي وتغيري جو، أخرجي لو عندك هواية معينة افضلي مارسيها

اهتمي دايماً بمظهرك لانه سر ثقتك بنفسك الي بتلعب دور كبير في رفع روحك المعنوية، ممكن تجيبي كذا باروكة اشكال مختلفة يكونوا مريحين ليكي وبدلي بينهم، كمان في مستحضرات تجميل كتير طبيعية ممكن تستخدميها اثناء وبعد العلاج وبيكون لمريضات السرطان ومالهمش تاثير سلبي

والأهم من كل ده اوعي تفتكري ان العلاج الجسدي بس هو الاهم وتتخطي الجانب النفسي

ممكن كمان خلال رحلة العلاج تكتبي جدول في خطوات علاجك وجلساتك وكل ما تخلصي حاجة اشطبي عليها لان احساسك بالإنجاز هيشجعك ويرفع روحك المعنوية ويأثر ايجابياً عليكي وعلى تأثير العلاج

والأهم من كل ده اوعي تفتكري ان العلاج الجسدي بس هو الاهم وتتخطي الجانب النفسي

ممكن كمان خلال رحلة العلاج تكتبي جدول في خطوات علاجك وجلساتك وكل ما تخلصي حاجة اشطبي عليها لإن احساسك بالإنجاز هيشجعك ويرفع روحك المعنوية ويؤثر ايجابياً عليكي و علي تأثير العلاج

في اخر كل يوم، اكتبي ٨ حاجات فخورة وممتنة بوجودهم في حياتك (شغلك/أكلك/عيلتك/او حتى قدرتك على السمع

. اكتبي كل اللي مزعلك وكل اللي عايزة تشتكي منه في ورقة وبعدين ارميها

دور الاسرة في رحلة العلاج

العيلة والصحاب هما من أهم الأسباب اللي ممكن تساعدك تعدي الأزمات مهما كانت صعبة ومستحيلة بأقل خسائر ممكنة، هما السند في وقت الشدة وهما الضهر والعون في الأوقات الصعبة احنا كلنا عارفين ان التعامل مع الأزمة بيفرق من شخص للتاني في ناس ممكن تهرب، في ناس ممكن متعرفش تتعامل وفي اللي ممكن من كتر خوفهم يكونوا حمل مش سند للي تعبان واحنا حاولنا نجمعلكم بعض الحاجات الي لو عملتوها أكيد هتساعدوا بيهم

١-البحث! لما يتعرض أحد أفراد الأسرة لمرض ما، لازم تبحث كويس وتجمع معلومات كافية عن المرض، وما تكتفيش بتشخيص الطبيب، لازم تعرف المرض وأسبابه ومضاعفاته، كل ما تعرف عنه اكتر كل ما كانت طريقة التعامل معاه والحد من تطوره أسهل والتخلص منه أسهل وأسرع

٢- الدعم هو أنك تكون شخص داعم لكل اللي حواليك وخصوصاً للي يستحق أنك تعتني بيه وممكن تختلف أشكال الدعم من شكل لأخر حسب الحالة المرضية اللي بيمر بيها المريض،

٣-ممكن يكون الدعم من خلال الاهتمام والعناية الجسدية، أو أن تكون مستمعا جيدا لكل فضفضاته على سبيل المثال، اللي هتساعده بعد كده على تخطي الكثير من العقبات المتعلقة بمرضه. الأمور هتتغير، ولازم تعرف ان لن يبقى شيء على حاله، فا المريض هيتحسن في يوم من الأيام

٤-لازم تراعي كل التغيرات اللي يمر بها مريضك، ويفضل أنك تحاول أن تتقبل الوضع من غير خوف وتوتر، فعملية التكيف مع التطورات الجديدة في حياتك وعلى حياة هذا الشخص المريض، هتكون بالنسبة ليه زي الدواء الروحي اللي هيساعده على التغلب على المرض الجسدي الذي يعاني منه.

٥- اعرض عليه المساعدة

٦-اسأل عليه

٧- إسمحله انه يزعل بس حاول تخليه يضحك بانك تعمله اللي ممكن ينسيه زعله

٨-حاول تتكلم معاه في مواضيع بعيدة عن المرض

٩- ممكن تساعد المريض في شغل البيت فا ميشلش همه

١٠-ممكن تراعي ولادها لو عندها أطفال وتسأل عليهم

١١- ممكن تحضرلها أكلات حلوة وتوديهلها

١٢-ممكن تروحي معاها لمجموعات الدعم النفسي وتشجعيها

١٣- اقضي اكتر وقت ممكن معاها في البيت هي أكيد محتاجة ده

العيلة هي أهم الدعائم الرئيسية ، فا من واجبات كل فرد في العائلة أنه يقف مع الشخص و يمد ايد العون للشخص المريض ليه، فمؤازرة المريض ومناقشة حالته المرضية معاه هتخليه يتأكدو يحس بأنه مش لوحده، بالعكس فيه ناس وعيلة بتحبه، ولازم انو يحارب المرض علشانهم، علشان يتعافى ويدخل السعادة على قلبهم تاني، وهو ده السبب الأساسي اللي ممكن يكون سببب محاولة كل مريض لمرض

وفي النهاية خليك إيجابي خليك متفائل وده هيساعد أوي في التعامل والتأقلم مع المرض.

قصص ونماذج من محاربات

مصدر الهامنا كانت أقرب حد لينا ووالدة فينا وهي دلوقتي محاربة سابقة وبطلة قصتنا زي أي مريضة سرطان، بدأ الموضوع لما اكتشفت انها في أواخر المرحلة الثالثة من سرطان الثدي وهنا كانت الصدمة، أم أرملة لبنت و ولد وخايفة على ولادها أكتر من نفسها و عايزة تفضل الدعم ليهم، جت على نفسها كتير لحد ما وصلت لمرحلة الجهاز المناعي مش بيتجاوب مع العلاج هنا حست إنها لازم تاخد خطوة و تطلب الدعم من صحابها و إخواتها يساعدوها و يحسنوا نفسيتها تتغلب على المرض. و فعلاً و قد كان ، دلوقتي هي محاربة سابقة و هزمت المرض بكل ما فيها من قوة.

و تاني قصة معانا كانت المحاربة السابقة ناهد الي اتعرفنا عليها في بيهة و الي كانت من ضمن فريق الدعم النفسي و الي قررت تدي خبرتها لمرضى تانيين و تقف جمبهم بعد انتصارها على المرض ، و من ضمن القصص الي سمعناها منها على أهمية الدعم النفسي لمرضى سرطان الثدي ، حكتلنا عن حالة مكانتش بتتجاوب مع العلاج نهائياً و لما دوروا وصلوا إن زوجها كان غير متقبل ليها بعد المرض و كان خايف منه ، و بعد تثقيفه و توضيح أهمية الدهم النفسي ابتديت حالة المريضة تتغير و تتقبل العلاج .

بطلة لحكايتك – نهال نبيل ft. شادي حسن

#بطلة_ـلحكايتك #نهالـ_نبيل #شادي_حسنكلمات الشاعر أمير طعيمة ألحان شادي حسن توزيع موسيقي أحمد إبراهيم ميكس و ماستر أحمد إبراهيمفيديو : نهال نبيل#NEHAL_NABIL FT. #SHADY_HASSAN#BATALA_LEHEKAYTAK

Posted by Nehal nabil on Monday, March 25, 2019

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
إغلاق